გამოსავალი

ფსიქოსოციალური სარეაბილიტაციო ცენტრი

ჩვენ გვჯერა, რომ ადამიანების სულიერი სამყაროს გამოსაცოცხლებლად, სიმშვიდის მოსაპოვებლად, თავდაჯერებულობის ასამაღლებლად, საკუთარი შესაძლებლობების რეალიზაციისთვის არსებობს ალტერნატიული გზა და რაიმე ნივთიერება სულაც არ არის საჭირო. ჩვენი მიზანი მხოლოდ ნარკოტიკის/ალკოჰოლის/თამაშის თუ სხვა მავნე ჩვევების დამარცხება კი არ არის, არამედ ის, რომ დავეხმაროთ ადამიანებს, ებრძოლონ აკვიატებულ შიშსა თუ აზრებს და იცხოვრონ დამოკიდებულების გარეშე ჯანსაღად და სრულფასოვნად.

ადამიანები ძალიან განვსხვავდებით ერთმანეთისაგან, თუმცა, არსებობს ღირებულებები, რომლებიც საერთოა ასეულთათვის და ათასეულთათვისაც კი. ჩვენც გაგვიმართლა და შევიკრიბეთ სწორედ ის ადამიანები, რომლებსაც გვაერთიანებს მიმღებლობა და თანაგანცდა, სიყვარული და ყურადღება, მეგობრობა და მხარდაჭერა, ასევე, ის, რაც მთავარია, გულწრფელობა.

ის ნარკომანია, ნარკომანი კრიმინალია, ეს მისი არჩევანია, ყველა დამოკიდებული უნდა დაიჭირონ, მათ არავინ უყვართ ... ეს არის ძალიან მძიმე ბრალდებები, ერთგვარი განაჩენი ისედაც მძიმე ემოციურ მდგომარეობაში მყოფთათვის და სწორედ ამ სტერეოტიპული შეხედულებების გავლენით საზოგადოება განსჯის დამოკიდებულ ადამიანებს, რის შემდეგაც ისინი კიდევ უფრო მეტად განიცდიან წნეხს და კიდევ უფრო მეტად იხლართებიან საკუთარ პრობლემებში.

ჩვენ გვამოძრავებს ძალა და სურვილი, მივწვდეთ ყველას:
ვინც ცდილობს თავი დააღწიოს მიჯაჭვულობას ნარკოტიკზე, ალკოჰოლზე, აზარტულ თამაშებზე, ემოციებზე და ა. შ.
- ვინც ვერ ხვდება, რატომ გახდა მიჯაჭვული;
- ვინც ეძებს კითხვებზე პასუხებს;
- ვისაც უნდა, რომ გადარჩეს;
- ვისაც უნდა, რომ შეიცვალოს;
- ვისაც უნდა, რომ ესმოდეთ მისი, უგებდნენ და უყვარდეთ ის;
- ვინც ღელავს მისთვის საყვარელ ადამიანზე, ოჯახის წევრზე, მეგობარზე;
- ვინც მზად არის მონაწილეობა მიიღოს ადამიანების ცხოვრების გაუმჯობესებაში.